أناعايز أعرف حاجه: هوه إيه الخطة فى مصر بالظبط بعد حسنى مبارك؟ يعنى الحكومة عامله حسابها على إيه لو حسنى مات دلوقتى؟ هوه ممكن يموت صح؟ أصل بعد أكتر من 25 سنة فى الحكم ممكن تحس إنه بقى حاجه زى الإله... بقى آبدى. الواحد بقا مش عارف يتخيل مصر من غيره.
يا جماعة إيه الترتيبات الرسمية لو حصله حاجة؟ هى الحكومة مش واخده بالها إنه كبر و لا محضرين فيلم نهايتة جمال مبارك؟ بصراحة الإحتمالات كلها مبتبشرش بالخير. لو مفيش نظام مترتب لما بعد حسنى مبارك يبقى البلد دخله على فوضى كبيرة لا يمكن النتيجة منها يكون أى حل ديموقراطى. ده مش بعيد كمان يبقى فى حروب أهلية صغيرة كده. الإخوان والجيش مثلاً... أو مسيحيين و مسلمين. لو مفيش خطة يبقى كإننا بنرمى 6 زهرات و لو جم على ست ستات النتيجة ديموقراطية سلمية، أى حاجه تانية النتيجة مصايب. إحنا و حظنا بقى.
طب و لو الحكومة عندها خطة، ليه ما بيقولوش؟ يمكن أنا جاهل و معرفش الإجرائات الرسمية دى... بس معتقدش. عمر ما قابلت حد و قلى بالظبط المفروض يحصل إيه لما حسنى يموت (يظهر إن دى الطريقة الوحيدة اللى هايسيب بيها الاحكم). ده حسنى حتى ما عندوش نائب زى ما كلنا عرفين. هيعملوا إيه لحد ما ينتخب رئيس جديد؟ هاينتخب رئيس جديد أصلاً ولا أنا قلبى أبيض؟... مش عارف. بس تكون إيه الخطة اللى مفيهاش إنتخابات و مش محتاجه نائب؟... معرفش برضه أنا مليش فى الجهات الرسمية و علاقتها بعضها ببعض. بس عشان خطرى لو حد يعرف يقول.
لو فعلاً حاولوا يحطوا جمال مكان مبارك إتهيائلى الناس هتولع فى البلد و فى نفسها من القهر. أنا أكيد هتقهر لو حد حكمنى 27 سنة و بعدين راح محكم إبنة عليا... خصوصاً بالنتايج دى. إنتم عارفين؟ ده تالت أطول حكم فى تاريخ مصر بعد رمسيس التانى و محمد على!!
هناك ٣ تعليقات:
انا الاول .. طب كويس
فوضي ليه يا جميل الشعب لا يحكم ولن تحدث اى ثورة او فوضي بالتأكيد .. هناك فجوة ضخمة بين الشعب و الحكومة و مش فارقة في تلك الفترة من الزمن من يحكم ..
على فكرة الرسول محمد لم يولي احد بعده و ده عادي بين الشعوب الاسلامية الى جانب ان البابا شنودة لم يولي احد بعده .. يعني اشمعنا مبارك هو اللى هيولي حد..
طيب سيناريو جمال هيكون معقول جداً لسببين ان جمال مش عسكري والحمد لله و اكيد هيكون تفكيره مش بوليسي وبالطريقة دى محمد نجيب هيرتاح في طربته و تتحقق احلامه.. اما السبب الثاني ان جمال مش اخونجي و مش بيحبهم ده كمان ممكن يلمهم زي جمال عبد الناصر .. وعلى فكرة الحكومة الحالية تميل الى العلمانية اكثر من التحفظ ..
انا مع اى حد يحافظ على الحريات الموجودة حالية و يسمح بالمزيد منها لا ان ياخذ منى حريتي الحالية و نقعد في البيت و اى ست تخرج من غير محرم تضرب في الشارع ..
لو ان جمال هيحافظ على الحرية و هيسمح لينا بممارسة حياتنا بطريقة طبيعية و يبقي هادئ زى ابوه و منحاربش علشان العرب زى جمال عبد الناصر هحترموا و احبوا ..ولو حد تاني هيعمل كده و يحافظ على الاستقرار في البلد الناس تاكل و تشرب و تسكر و تحب و تستمتع بحياتها .. أهلاً و سهلاً .. هيلبسونا ستات و رجالة حزام العفة و يقعدونا في بيوتنا و يقيمو علينا الحد .. هنطلع دينهم و هنخرجهم من مصر بلدنا احنا مش بلدهم هم يروحوا باكستان .. افغانستان ايران .. اهو اى اان و السلام بعيد عن مصر بلد التعددية بلد الالف اله .. بلد امون .. مش اخناتون
اول زيارة لى ولن تكون الاخيرة
اتمنى ان نكون اصدقاء
تحياتى
لاسف عزيزى الشعب المصرى خلاص بيقى خايف دلوقتى .. كل واحد همه بس يلم فلوس لعياله وبس ..
الشعب بيقى جبان دلوقتى خلاص .. مفيش كرامة للمصرى .. اساسا المصرى الى خلا نفسه كدا .. بقينا نسكت على كل حاجة .. حتى الفشل بيقت كلمة عادية ..
حتى الفساد فى الوزارات بيقت عادىىى جدا ..
لاسف مصر ضايعة ضايعة خلاص ..
...................
اول زيارة لى لهذه المدونة الرائعة .. سعيد جدا اننى وجدتها ..
إرسال تعليق